I gcomhthéacs na socruithe sonracha a bheartaítear faoi Airteagal 6(2) den Phrótacal, ba cheart uirlisí faireachais margaidh agus uirlisí forfheidhmiúcháin a úsáid i gcomhar chun faireachán a dhéanamh ar an sreabhadh earraí agus chun aon riosca go bhféadfadh earraí teacht isteach san Aontas nó sa Ríocht Aontaithe go neamhdhleathach a bhainistiú.

Comhar feabhsaithe idir an Ríocht Aontaithe agus an tAontas, agus idir an Ríocht Aontaithe agus údaráis na mBallstát i gcás inarb iomchuí, i ndáil le gníomhaíocht éifeachtach faireachais margaidh agus forfheidhmiúcháin, ba cheart dó tacú leis na socruithe sin. Ba cheart dó sin tacú le faireachán agus bainistiú a dhéanamh ar na socruithe sin gan gá le haon seiceálacha ná rialuithe ag an teorainn idir Tuaisceart Éireann agus Éire.

D’fhéadfaí a chuimsiú sa chomhar sin comhroinnt eolais, malartú faisnéise, obair le hoibreoirí agus gníomhaíocht chomhpháirteach i gcás inarb iomchuí, go háirithe idir údaráis i dTuaisceart Éireann agus sna Ballstáit ábhartha, chun dul i ngleic le gníomhaíocht neamhdhleathach agus smuigleáil, chun a áirithiú nach gcuirfear earraí ar an margadh nach gcomhlíonann na caighdeáin is infheidhme, agus chun a áirithiú go dtabharfar tosaíocht do ghníomhaíocht forfheidhmithe agus faireachais bunaithe ar rioscaí agus ar fhaisnéis. Áiritheoidh na húdaráis freisin feasacht lucht gnó agus oibreoirí ar an rochtain ar an margadh atá ar fáil d’earraí atá ag gluaiseacht idir Tuaisceart Éireann agus an tAontas, i gcás ina gcomhlíonann na hearraí sin na ceanglais is infheidhme, i gcomhréir leis an bPrótacal.

Ba cheart don Ríocht Aontaithe agus don Aontas oibriú go cuiditheach trí struchtúir an Chomhaontaithe um Tharraingt Siar, lena n-áirítear an Comhchoiste, chun tacú le feidhmiú éifeachtach na socruithe nua, chun leas na ndaoine agus na n-gnólachtaí i dTuaisceart Éireann.